انا شاب فى20 من عمرى وزرت دير البراموس كذا مره وليا علاقه مع راهب من هناك كويسه وجالى فكر الرهبنه واريد ان اكون راهبا وانا مش عارف هل دا فكر طايش ولا لا؟مع العلم انى خادم وبحب الالحان اوى وتكلمت مع الرهب وقالى اللى فيه الخير يقدمه ربنا ارجو الرد بسرعه وبموضوعيه شديده لان دا قرار مصيرى
peter
شوف يا بيتر انا هارد عليك فى شوية نقط
لازم اولا تخلص دراستك , جيشك لو كان عندك جيش
علشان ده قرارا مصيرى لازم تسأل ربنا فى صلوات قوية لغاية ما ربنا يكشف لك لأن الرهبنه دعوة من ربنا، لازم تبقى متأكد ان ربنا داعيك للطريق ده تبقى متأكد انك سمعت صوت ربنا جواك
يساعدك فى اتخاذ الطريق اب إعترافك، لان اب اعترافك بتكشف له ادق تفاصيل حياتك فيقدر يرشدك للموضوع ده
تكرار زيارتك للاديرة و تكرار فترات الخلوات هيوضح لك انت هتقدر تكمل فى طريق الرهبنة ولا لأ
كمان لازم يكون لك ارتباط مستمر بالخدمة، و الصلوات و قراية الكتاب المقدس بانتظام، و لانك شماس بتحب الالحان يبقى ارتباط بخدمة المذبح و القداسات... معقولة هتبقى راهب و ماليكش حياة روحية قوية مع ربنا، او تبقى راهب مش بيقرا فى الكتاب المقدس
الراهب قبل مايترهبن لازم بيجرب حياة الرهبنه فى بيته علشان لما يروح الدير ميبقاش فيه حاجة اتغيرت غير المكان، و لو لقيت انه الرهبنة مش سكتك اوعى تضايق لانه الزواج مكرم عند الله زى ما الرهبنه مكرمة ايضا