جدو كرمشه انا اسمي ماريان بعتلك قبل كده رساله عن شخص اتعرفت علي عن طريق النت وبعد كده قولتلك انه عايذ يتقدملي وبعد كده اكتشفت انه كداب وانته قولتلي ابعدي عنه المهم الشخص ده جالي البيت فعلا علشان يتقدملي وانا صليت لربنا قوي وبعد لما كان الموضوع ماشي لقيته بيتعقد وبيقف ومن الحظه ديه اتأكدته اني ربنا ميش رايد وفعلا الموضوع وقف احنا في البيت وقفنا انا كنت مبسوطه جدا بس المهم اني كان في موضوع لشخص قريبي اتقدملي من سنين فاتت بس انا رفضت الموضوع علشان ببوس للشكل هو مقبول بس ميش من الشباب اليومين دول ومستوي كويس وشقته كويسه جدا في مكان راقي وشغله كويس جدا
المهم بعد الموضوع الشخص بتاع النت بأسبوع الشخص ده اتقدملي تاني وفي خلال اسبوع كنت شايفه الشقه وجابلي الشبكه كل ده في اسبوع واحد المهم انا حاسه اني مقصره من ناحيت الشخص ده هو كويس وبيحبني قووووووي قوووووووي وطيب وحنين وعالته ناس كويسين قوووووووووي السؤال اليه عايذه اسألهولك هو ده ترتيب ربنا لي وياتره بعد الارتباط الجواز الحب هيجي ومن معاملته لي هحبه ميش عايذه اظلمه لانه فعلا طيب وبيحبني
ماريان
شكرا ليكى يا ماريان لانك سمحتى لربنا انه يتدخل فى موضوعك و هوه ده المطلوب لانه الله هوه وحده القادر انه يكشف الطريق اللى ماشيين فيه و ينوره قدامنا لانه هوه المكتوب عنه
(أَيُّوبَ 12 : 22) يكشف العمائق من الظلام و يخرج ظل الموت الى النور.
فقط كل المطلوب منك انك تشركى الله الحنون الصالح فى كل تفاصيل حياتك، كأنك بتدردشى معاه طول اليوم، و تسأليه اعمل ايه فى الموضوع ده و اتصرف ازاى ..يارب محتاجة ايدك و محتاجة قوتك و محتاجة انك ترشدنى و صدقينى هتشوفى عجايب مهما ربنا اتأخر ففى تأخره حكمة هتعرفيها فى وقتها، و قوليله يارب آخد من ايدك انت بس لانك صالح و عطاياك صالحة ولانك غنى و كريم و عطاياك كريمة زيك.
أما بالنسبة لخطيبك الجديد، لو هوه بيعاملك كويس و حنين و طيب يعنى ايه اللى يخليكى تقلقى، الحب هوه عبارة عن أفعال طيبه موجهه لشخص، يعنى الحب مش بس شوية كلام حلو و عند الجد يتبخر لكنه مجموعة من الافعال و اعمال المحبة ...يعنى لو عندك زرعة فى البيت و بتحبيها قوى لكنك مش بتسقيها ولا بتهتمى بيها...النتيجة انها هتموت. الحب بيستمد حياته و عمره من أعمال الحب، الاهتمام و السند و الوقوف فى المواقف الصعبة و البذل من اجل الاخر و كتير من الافعال الموجهه ناحية الشخص اللى بنحبه. وده اللى بيخلينا نحب شخص و نتمسك بيه، خلى بالك الانفعال العاطفى بشخص تانى ده مش حب، يعنى لما احس بإنجذاب ناحيه شخص من ناحية شكله او لبسه او بس طريقة كلامه ...ده مش حب
نصيحتى انك تحاولى تقدمى لخطيبك اعمال محبة زى اللى بيقوم بيها و فى نفس الوقت تصلى لربنا انه لو كان هوه ده الشخص اللى بعتهولك يفرحك بيه ويعرفك انه هوه ده ابنه اللى بعتهولك
وربنا يفرحك ويملا حياتك باعمال محبة لكل الناس و يكون ربنا هو مشيرك الاول فى كل خطوه بتخطيها فى حياتك