ازيك عامل ايه و ايه اخبارك انا اول مرة ادخل على الموقع ده و بصراحه انت عجبتني اوي و كلامك حلو اوي و نفسي ربنا يقدرك و تكملنا الخدمة الحلوة دي على طول و دايما تدينا خبرتك اما دلوقتي عندي سؤال محيرني تسمحلي اقولهولك؟ انا مش عارفه احدد هدف لي و دايما بحس اني لوحدي و مافيش حد بيشجعني على اي حاجه و مهما عملت انا برضه متلامه وعلى فكرة انا بحب الموسيقى و بغزف لكن عدم الشعور اني بعمل حاجه صح مخليني اقلل من الجلوس على الاورج او حتى التفكير في العزف مرة اخرى وفي حاجه كمان انا نفسي احس بالاهتام و الحب زي اي بنت اتمنى انك تكون فاهم انا اقصد ايه بالضبط و اتمنى ترد عليا بسرعه لان الاحساس ده بيحسسني اليأس
gangona
وليكى منى كل هاى....انا اخبارى تمام طول ما انا مسنود على المسيح، بصى موضوع الاهداف و التفكير فيها حاجة جميلة قوى فى بداية الحياة فيه حاجتين لازم نفرق بينهم
الاولى هى الاهداف قصيرة الامد و هدفى من الحياة نفسها و ده هو الاهم و اللى نتكلم عليه الاول
الهدف الأساسي من الحياة انى اوصل للمسيح و اكون معاه فى ملكوت السموات و ده اهم حاجة فى حياتى لازم اسعى اليها بإستمرار، فيها توبة و سقوط و توبه تانى و قيام و جهاد و نعمة وصلاة و تناول و اسرار و اعتراف وصلبان وعناية ربنا و محبته ...حياة جميلة ممتعة بس لو كان فيها المسيح هو الاساس و هو هدف الاهداف.
لو كان الهدف الرئيسى مظبوط على المسيح تلاقى الاهداف قصيرة المدى ناجحة و بتمجد ربنا...يعنى انتى بتعزفى موسيقى و نفسك تكملى و تنمى الموهبة دى لما يكون المسيح فى الحياة تلاقى الموهبة شقت طريقها للخدمة فى كورال الكنيسة مثلا او تقدرى تعزفى الحان جميلة فى الكنيسة فى الحفلات المختلفة او حتى تعزفى لاولاد و بنات حضانه او ابتدائى يعنى الموهبة بقى ليها طعم لانها اخذت شكل الخدمة وربنا يباركها ويشتمها كتقدمة جميلة من ايديكى و كمان يستسمنها يعنى كأنها ذبيحة سمينه يعنى مبقلظة كده زى ذبيحة اللى قدمها هابيل مش ذبيحة مرفوضة زى قايين
انتى تصلى علشان ربنا يكشف لك فين الموهبة اللى حطها فيكى و كمان تطلبى منه تستخدميها ازاى و لما تقدميها تقدميها من خلاله وله
الاهداف القصيرة زى الدراسة و ازاى الشخص اللى ماشى مع ربنا بيبقى ناجح لانه امين فى مزاكرته و وقته مش بيضيعه و ربنا كمان بيقف معاه فى الحاجات الصعبة
و اهداف قصيرة زى مثلا قراءة مجموعة من الكتب فى وقت محدد او قراءة سفر من الكتاب المقدس فى فترة زمنيه محددة و هكذا...بس الاهداف الصغيرة بتبقى ناجهة لما الهدف الرئيسى مظبوط على المسيح يسوع ربنا اللى هو مصدر كل نجاح
اما الجزء الخاص بالاهتمام ده هيجى فى وقته متخافيش بس ساعات احنا بيبقى عندنا جوع للحنان علشان احنا بعاد شوية عن مصدر الحنان اللى هو ربنا، نقرب من ربنا ونطلب انه يغمرنا بحنانه هتلاقى الاحساس ده مش موجود و لما ييجى الشخص المناسب فى الوقت المناسب حتاخدى شويه من حب ربنا علشان العلاقة دى تتنجح......طولت عليكى..قولى طول كمان ياجدو....لأ كفاية كده وسلام ربنا يسوع المسيح كلون معاكى وللى قرأوا أمين