03 مايو 2010
Posted in
ركن جدو كرمشة -
ركن جدو كرمشة
مش عارفة خايفة اقول مشكلتى تقولوا دى مشكلة شباب مصر كلة انا الحقيقة خريجة هندسة مدنى دفعة 2007 بس انا من الصعيد من ... ولحد دلوقت مش لاقية شغل للمجال بتاعى وانا زهقت من البيت ونفسي اشتغل فى المجال الى انا درستة بس مش عارفة انا حاولت ادور على شغل خاص او حكومى بس للاسف محولاتى فشلت انا الموضوع دا مضايقنى كتير مش عارفة اعمل اية لدرجة انى جانى ايحاء انة يمكن ارادة ربنا انى مشتغلش او ربنا عايزنى كدة طيب لو ربنا عايزنى كدة اعمل اية عشان احس بقناعة بالوضع دا او اتكيف عليةاو اقبلة حتى مع انى حاسة انى دا صعب انا ش متخيلة انى ادرس 5 سنين دراسة صعبة عشان تبقى كل اهتماماتى البيت وبس شكرا جدا على الموقع بتاعكم ربنا يعوض تعبكم وارجو الرد
ماريان
بصى يا ماريان، ربنا عايزنا ناجحين إتأكدى من كده و الحاجة التانية ربنا صالح و يتمنى لينا كل عطية صالحة و اللى منها بيكون الشغل و المستقبل، يمكن يكون بيرتب لك حاجة حلوة بس محتاجة وقت لكن فى النهاية ربنا ميقدرش ينكر نفسه و لا عطاياه اللى هى صالحة و واخده من صلاحه و ميقدرشى يديكى عطية منقوصة، علشان كده بياخد شويه وقت علشان يديكى العطية الكاملة الصالحة اللى تفرح قلبك وتقولى بعدها يارب اشكرك من كل قلبى
(رِسَالَةُ يَعْقُوبَ 1 : 17) كل عطية صالحة وكل موهبة تامة هي من فوق نازلة من عند ابي الانوار الذي ليس عنده تغيير ولا ظل دوران..
افضلى صلى من كل قلبك ربنا يبعت لك شغل، لانه و يرتب حياتك و يختار لك الصالح من قلبه الصالح و صدقى كلام المزمور اللى بيقول الرب صالح، و اشكريه فى الوقت اللى مفيهوش عطية، يفرح بيكى و يهريكى عطايا
زى ما قال ايوب لإمراته: (أَيُّوبَ 2 : 10) فقال لها تتكلمين كلاما كاحدى الجاهلات االخير نقبل من عند الله و الشر لا نقبل
والكتاب المقدس بيعلمنا انه احنا نشكر فى كل وقت و الشكر بيجيب عطايا ربنا
ليست عطية بلا زيادة الا التى بلا شكر