03 مايو 2010
Posted in
ركن جدو كرمشة -
ركن جدو كرمشة
ازيك يا جدو وحشتنى انا تعبانة ياجدو اوى مليش نفس اعمل اى حاجه ف خياتى انا مش باروح الكنيسة ولا مشتركة ف اى نشاط ولا بطلع من البيت غير بالعافية كل فين وفين ماليش نفس اكل ولا اشرب ومره احاول ااقرب من ربنا ومره ابعد مليش نفس اكلم حد ودايما ازعق قرفانه وزهقانة حتى نفسى مش طيقاها مش طايقة اعيش مش عارفة عايشة لية حاولت اطلع واروح الكنيسة بس مش عارفة مش قادرة وماليش اصحاب ده معجزنى عن الكنيسة ولا قرايب
م
هحكيلك حكاية بس متناميش منى
مرة واحد ماشى فى الصحرا بعربيته، و بعدين لاحظ انها بتقطع و بعدين وقفت منه فى الصحرا، وقف يشوف ايه اللى فيها مش فاهم اى حاجة، جت عربية وقفت جنبه نزل منها راجل وقور، قال لصاحب العربية تسمح لى ابص عليها...فالراجل صاحب العربية استغرب و ساله انتى تفهم فى الفورد ...الراجل جاوبه بكل هدوء انا فورد
و ده كان مستر فورد مصنع العربيه اللى عطلت وطبعا مفيش حد يفهم فى تصليحا إلا اللى صممها
انا بحكيلك الحكاية دى علشان اقوللك انه مفيش حد يفهمك ولا يقدر يساعدك غير ربنا اللى خلقك و انتى و انا محتاجيين صيانة من وقت للتانى و مفيش حد معاه الكتالوج بتاعنا غير الله اللى خلقنا
الصيانة بتشمل التوبة و الاعتراف لانها بتنضف الموتور و التناول زى التموين بتاع العربية من غير غذا سماوى روحنا تبقى جعانه، لكن لما تشبع من المسيح فى سر التناول تلاقيها ثابتة فى ربنا، و لما تثبت فى ربنا تبقى فرحانه، و تبعد عن الاكتئاب اللى الواحد ممكن يعيش فيه لو بعيد عن ربنا
فى الاول اغصبى نفسك على مرواح الكنيسة و التوبه و الاعتراف و التناول.....شوية فى الاول بعد كده تفرحى بربنا لما تدوقى حلاوته وحلاوة العيشة معاه...حتدمنى حبه و متقدريش تبعدى عنه المسيح حلو و طيب و حنين ورحيم الى اقصى ما نتصور....شوفى المراة اللى امسكت فى ذات الفعل عمل معاها ايه
(إِنْجِيلُ يُوحَنَّا 8 : 10) فلما انتصب يسوع ولم ينظر احدا سوى المرأة قال لها يا امرأة اين هم اولئك المشتكون عليك.أما دانك احد..فَقَالَتْ: «لاَ أَحَدَ، يَا سَيِّدُ!». فَقَالَ لَهَا يَسُوعُ:«وَلاَ أَنَا أَدِينُكِ. اذْهَبِي وَلاَ تُخْطِئِي أَيْضًا».
الخطية هى اللى بتبوظ الموتور بتاعنا، التوبه تصونه و الاعتراف يكشف عيوبه و التناول زى البنزين و الزيت و الصلاة تمشيه لقدام