03 مايو 2010
Posted in
ركن جدو كرمشة -
ركن جدو كرمشة
هاى يا جدو انا اول مرة اتكلم معاك وبصراحة انا معجبة جدا بالردود اللى انت بتبعتها ونفسى الاقى حل مشكلتى عندك انا عندى 18 سنة وحبيت واحد عنده 22سنة المشكلة انه هو اللى خلانى اخد بالى منه هو مش معايا فى نفس البلد بس على طول باشوفه فى الاجازات وبنتكلم كتير لما بنتقابل وكل العائله عارفين وحتى مامته كانت بتلمحلى وفوجئت فى اخر مرة انه بيقول انه هايخطب بنت السنة الجاية وهى معاه فى الكلية وكان الخبر صعب لدرجة انى اصبت بأنهيار عصبى انا حاسة انى تايهة وتعبانة مش عارفة اركز فى محاضراتى او اى شىء اسفة يا جدو انى هاتعبك معايا
توته
(إِشَعْيَاءَ 63 : 9) في كل ضيقهم تضايق و ملاك حضرته خلصهم بمحبته و رافته هو فكهم و رفعهم و حملهم كل الايام القديمة
أجمل حاجة فى ربنا يسوع المسيح انه بيهتم بتفاصيل حياتنا الصغيرة قبل الكبيرة و حاسس بينا حتى لو كل الناس نسيونا، تأكدى من محبة ربنا ليكى، و انه حاسس باللى انتى فيه
الحاجة الجميلة التانية انه حب ربنا يغنيكى عن كل حب تانى و حتى الحب اللى بين البشر بيبقى مصدره ربنا، يعنى لو ركزتى فى حب ربنا ليكى حتحسى انه انتى مفقدتيش كتير لأنه هو عنده ليكى عطايا و محبة كبيرة ممكن تملا قلبك و تفرحك، إطلبى من ربنا انه يفرح قلبك بتعزيات روحيه وفى الوقت المناسب يبعت لك الشخص المناسب اللى يفرح قلبك
بلاش تستسلمى للحزن لأن دى مش نهاية الدنيا و بيقولوا فى الامثال الضربة اللى متموتش تقوى، اخرجى اقوى من الاول و امسكى فى ربنا اللى ماسك الكون و ضابط الكل و يقدر يبعتلك التعزية اللى تخلي قلبك ينط من الفرحة ...لو طلبتى ... و تنسى كل الحاجات المتعبة