03 مايو 2010
Posted in
ركن جدو كرمشة -
ركن جدو كرمشة
سلام والنعمة يا جدو انا حبيت اوى انى اعرض مشكلتى انا متزوجة من حوالى 3 سنوات واحب زوجى جدا انا وهو خدام فى الكنيسة لكن المشكلة ان زوجى له اخت كبيرة وغير متزوجة ومرتبطة به جدا جدا شفت منها كتييير جدا ايام الخطوبة ومع ذلك قدمت محبة وفضلت احاول اتصاحب عليها بالرغم من انها اكبر منى بعشر سنوات واحتويهاكنت ازورها باستمرار واتكلم معها ولكن كانت تقابل كل ده بغيرة اكثر على اخوها دائما تقول لى انه زوجها وتطلب على طول طلبات منه بالرغم ظروف شغله الصعبة هى مريضة نفسيا بقيت ارتعب لما تكلمنا لانها دائما مكتئبة ومفيش اى حاجة بترضيها نهائيا الحل عندها هى انها تقعد معى فى المنزل وده طبعا مستحيل لان طباعها صعبة جدا جدا انا ضميرى تاعبنى بسببها بس فعلا مش عارفة اعمل ايه لو سألت عليها تشيلنى هم كبير ومهما عملت مش راضيها بشكل فوق الوصف لدرجة انى بطلت اسأل عنها لان كل مرة اسأل عنها بتحسسنى بالتقصير مهما فعلت خايفة تعمل فى نفسها حاجة بسبب الوحدة مع العلم قبل كده هددتنا بعدم الاكل عدة ايام حتى اخذتها عندى البيت فعلا انا مش قادرة احتمل اكتر من كده ارجو الارشاد واسفة انى طولت
sola
المحبة هى مفتاحك مع الصبر و الصلاة علشانها، إعتبرى الموضوع ده هو صليبك اللى المسيح اداهولك، وقدمى محبة و هييجى اليوم اللى هتحبك فيه و تنتهى المشاكل وإعتبرى انه ده إختبار للمحبة انتى اتحطيتى فيه و هتتصرفى ازاى؟؟!!
الطريق القصير انك تقولى ماليش دعوه من الاول و كل واحد مسؤول عن نفسه و تتبرأى منها، بس هل الحل ده يخلى فيه سلام بينك و بين زوجك؟ وكمان تكونى خسرتى بركة المحبة، لكن لو اخدتى الطريق الاصعب و هو انك تقدمى ليها حب بجد و تصلى علشانها و تصبرى، ربنا يبص على اعمال المحبة اللى انتى بتقدميها من قلبك و يشمها ذبائح بريحة و طعم الزبدة الفلاحى... اقصد بريحة المحبة الجميلة و يتباهى بيكى قدام ملايكته ويرفع عنك تقل الصليب ده. مش لازم تسكن عندك لن تزوريها بإستمرار و تشوفى هى محتاجة ايه و ايه اللى بتحبه يعنى لو فيه صنف اكل هى بتحبه ممكن تعمليهولها و توديه ليها...شويه شويه هى حتتأكد انك فعلا بتحبيها و هتحبك و لسانها حيتغير بس اصبرى و ممكن تتعلمى من خدمة العذراء لأليصابات فى تعبها و حملها رغم انه العذراء مريم كانت هى كمان حامل و محتاجة للرعاية.
و ممكن تتعلمى من الام تريزا اللى كانت بترعى مرضى الجزام و تعطف عليهم و غيرهم كتير...